GEDONG: Serakup Raban Indu Sarawak (PPWS) diperansang terus regas bejalaika pangku pengawa sida ngatur bemacham program ngaul komuniti ngambi dikelala mensia mayuh enggau meri empas positif ngagai pemansang komuniti, lebih agi indu menua pesisir.
 
Kaban Parlimen Batang Sadong, Rodiyah Sapiee madah, PPWS nya siti gempung ngesan pangku pengawa besai nyadi penyungkak pemansang indu ukai semina ari sukut sosial aja, tang mega ba pengawa ekonomi, pelajar enggau tuai komuniti.
 
“Aku ngarap ke PPWS ba renggat genturung pendiau enggau pampang ulih ngatur mayuh agi program baka bengkel pengelandik, pengawa dagang, pengerai indu enggau licha diri sebilik ngambi pangku pengawa sida tampak agi enggau dikelala mensia mayuh,” ku iya.
 
Iya nibar ke jaku nya ba Pengerami Ngiling Tikai Taun 2025 di Kampung Semalatong A, ditu, kena Hari Enam.
 
Rodiyah mega madah ke diri deka terus nyukung sebarang inisiatif enggau pengawa PPWS nambahka pengelantang raban indu ba sitak Parlimen Batang Sadong.
 
“PPWS patut gawa seriris enggau arus pemansang sereta ngetan penyiru ke diri sebilik enggau budaya lokal ti nyadi  identiti indu Sarawak,” ku iya madah baru.
 
Kelai sukung, Rodiyah mega nyua agih belanja RM5,000 ngagai PPWS Kampung Semalatong A ungkup ngatur pengawa Niti Daun ti deka diatur taun baru.

- EDISI UKAS